【Now.com】MIRROR相隔近9個月，再次推出廣東歌《Hunt You Down》，MV中12子更Man爆化身捕獵者，為大家帶來全新感覺！想知12子有幾型？即睇片！
有別過去團歌的曲風，新歌《Hunt You Down》以捕獵者追趕獵物的決心作主題，。隊長Lokman介紹：「今次首歌相對節奏變化會多少少，rap亦會多過唱嘅部分，另一樣好新鮮嘅係，首歌有3種曲風喺入面。」Edan就指：「前面好快好刺激好野性，但去到中間突然變咗抒情輕鬆曲風，但之後再入番去原本曲風，今次新嘗試，喺廣東歌都未見過。」Jeremy則指新歌有種野性風格，是團隊未試過的，比之前的風格更成熟。Edan都認同指跳舞跳得好爽，「有種男人嘅味道出咗嚟！好期待跳現場畀大家睇！」
在歌曲最後會聽到姜濤chok爆唱出「You better run」這一句，原來加入這句是他的主意：「其實係借鑑好多團體，喺歌曲最後都會加句句子，強調番成隻歌嘅重點，本身冇諗住係『You better run』呢一句，我純粹提議想加一句說話喺隻歌最後，因為我覺得成隻歌比較惡，喺MV入面我哋係一班狼一班武士，斬殺敵人。」MIRROR為了更「Man」，今次在舞步上亦有很大的新鮮感，但同時亦甚有難度，姜濤續指：「排舞嘅力度都同以往比較唔同，每次都有新嘢畀大家睇吓，想畀大家唔同嘅感覺。」Frankie亦坦言今次舞步較以往難，要配合唱歌，對他們來說都算是一個挑戰。
除了跳舞，Tiger亦指新歌MV邀請了其他動作演員一齊演出，笑言今次MV絕對值得期待。MV內多位成員都被安排動作場面，其中Jer更要站在高處擺Pose，他笑言：「對於克服咗畏高嘅我嚟講，係一啲都唔驚，少少高，但OK，高啲都仲得呀！」而副隊長AK與Alton則要聯手以壘球棒擊退敵人，AK表示「過癮」，Alton亦自爆未roll機前練了很多次。「大表波」Stanley就大玩日本武士刀，他說：「今次第一次拍嘢接觸日本刀，都幾好玩，同埋個鏡頭都幾有型，不過始終我哋功底唔同武師出身或者動作演員，而家空閒時間都有上動作訓練堂，希望日後可以接拍嘅類型會多啲。」
另外，12子在MV中的服飾有毛毛元素，Ian更大爆：「今次套衫，全部人身上都有啲毛，Tiger（被）安排咗老虎，我開頭見到自己有啲動物嘅毛，就扮狼叫，Lokman都可以做狼，因為佢都有扮狼叫。」MV亦用上了3D掃瞄技術，再配合電腦合成影像，MIRROR瞬間變成了機械人在場景內起舞，Anson Lo向「神徒」介紹：「今次有3D掃瞄嘅科技，掃瞄完每個人嘅樣，就可以做到唔同嘅打鬥場面，同埋一啲跳唱嘅畫面，用上呢個新科技係好得意同埋好新奇，大家可以估下邊個先係真正嘅Anson Lo，邊個先係3D掃瞄出嚟嘅Anson Lo喇！」
